Mánudagur 28. nóvember 2011

Í dag skokkuðum við framhjá mollinu, ég til að taka strætó í skólann og Maggi með Sigga í vagni á leið í göngutúr, en þar var bara lögregluteip útum allt, þyrlur á flugi, mollið tómt og lokað og engir strætóar því göturnar voru fullar af lögreglu- og slökkviliðsbílum. Það hafði víst verið framið vopnað rán í gullbúð í mollinu og ræningjarnir skilið eftir grunsamlegan pakka, sprengjusveitin var á svæðinu að fjarlægja hann og leita af sér allan grun um að það leyndust fleiri á staðnum. Þvílík læti. Pakkinn reyndist meinlaus og nú er allt komið í samt lag í hverfinu á ný, en þetta hafði af Magga kaffibolla og ég varð að taka pendeltåg í fyrsta sinn síðan ég flutti hingað til að komast á bókasafnið. (Óli: Pendeltåg er eins og stór neðanjarðarlest nema mikið minna neðanjarðar. Mjög vinaleg og hraðskreið. Þú hefðir fílað hana.) Er sprengjuvesen einhver árleg jólahefð hérna í Stokkhólmi? Mér er ekki skemmt, en þetta var þó sem betur fer mikið meinlausara en í fyrra.

Miðvikudagur 23. nóvember 2011

Siggi var svo pirraður í dag að ég þurfti á einum tímapunkti að taka hann af Magga, sem var búinn að opna gluggann og var að miða honum út. Í kjölfarið af þessum nýja pirringi, og órólegum svefni síðustu nætur höfum við ákveðið að prófa að gefa drengnum smá graut á morgun. Ég er mögulega aðeins of spennt.

Þriðjudagur 22. nóvember 2011

Í dag fór Siggi að velta sér af maganum yfir á bakið. Ef hann lærir fljótlega að velta sér af bakinu yfir á magann erum við í klandri, þá fer maðurinn að geta velt sér út um allt! Þurfum að sauma lóð í fötin hans eða eitthvað…

Sigurður dagsins er nýbaðaður og ferskur

Sigurður dagsins er nýbaðaður og ferskur

Nomnomnom

Nomnomnom

Föstudagur 18. nóvember 2011

Í morgun mættum við Íris nývaknaðar og ferskar í nudd á tælensku hverfisnuddstofunni. Nuddkonurnar tala hvorki sænsku né ensku, svo ég vona að við höfum skilið patið rétt sem “Farið úr öllu nema nærbuxunum” því annars vorum við fáránlega óviðeigandi kúnnar. Nuddið var æðislegt, þessar dömur vissu greinilega hvað þær voru að gera. Þetta verður örugglega ekki síðasta heimsóknin mín þangað (nema við höfum misskilið patið og ég sé ekki velkomin þangað aftur…).

Þegar heim var komið fórum við Maggi að undirbúa Idol-kvöld vikunnar, þar sem við ætluðum að bjóða uppá íslenskt lambalæri sem mamma færði okkur í haust. Við höfum hinsvegar aldrei eldað neitt svona fullorðins, og vorum í nettu kvíðakasti. Eftir skype-ráðstefnur með bæði mömmu minni og pabba Magga dembdum við okkur bara í verkið og það tókst glimrandi. Að vísu var matur kl. 22, en gestirnir sýndu því ótrúlega þolinmæði, mögulega af því við sáum þetta vandamál fyrir og sköffuðum nasl. Okkur tókst meira að segja að brúna kartöflur og búa til sósu úr kjötsoðinu! Það var enginn meira hissa en við sjálf. Kvöldið var frábært, það var réttur söngfugl sem fékk að fjúka úr Idolinu og Sigurjón leysti okkur að lokum öll út með tannverndandi gjöfum. Það gerist ekki mikið betra.

Sigurjón og Siggi í kósí

Sigurjón og Siggi í kósí

Lærið á leið inn í ofn (ég gleymdi að mynda það tilbúið, það var töluvert girnilegra þá...)

Lærið á leið inn í ofn (ég gleymdi að mynda það tilbúið, það var töluvert girnilegra þá...)

Siggi í nýja útigallanum á leið í matarbúðina (takk amma og afi!)

Siggi í nýja útigallanum á leið í matarbúðina (takk amma og afi!)

Fimmtudagur 17. nóvember 2011

Viðburðalítill fimmtudagur, ég var í skólanum allan daginn og strákarnir dunduðu sér heima. Þeir voru skuggalega sakleysislegir á svipinn þegar ég kom heim og púðarnir í sófanum óvenjulega flöffí. Ég ætla að skjóta á teppavirki í stofunni.

Blondína dagsins

Blondína dagsins

Miðvikudagur 16. nóvember 2011

Siggi er 4ra mánaða í dag. Hann veltir sér óvart og er alltaf jafn hissa, hlær innilega þegar pabbi hans lætur hann dansa við oldschool rapp/hipphopp/whothehellknows, vaknar kátur á hverjum morgni og helsta markmiðið virðist vera að koma einhvern daginn báðum hnefunum uppí sig í einu.

Ég er flutt að heiman að skrifa ritgerð, feðgarnir dúlla sér heima við að horfa á misgáfuleg myndbönd á youtube, og við erum öll orðin frekar skrautleg þar sem hér hefur ekki verið þveginn þvottur í þrjár vikur. Á morgun er það annaðhvort þvottahúsið eða H&M…

Afmælisstrákur

Afmælisstrákur

Til samanburðar: 2ja mánaða afmælisstrákur

Til samanburðar: 2ja mánaða afmælisstrákur

Mánudagur 14. nóvember 2011

Í dag fóru feðgarnir mínir í ungbarnaskoðun. Það var ekki alveg sársaukalaust, því við gleymdum henni þar til hálftíma áður en við áttum að mæta, svo þá þurfti að vekja barnið, skipta á honum, úr náttfötum í föt, í vagn og hlaupa svo á heilsugæslustöðina. Við missum eitt foreldraprik. Siggi hinsvegar stendur sig vel, hann er orðinn 64 cm að lengd og 7,3 kíló. Í tilefni þess að litla rækjan okkar er alls engin rækja lengur, þá eru hér nokkrar myndir síðan hann var meira kríli.

Strípalingar á spítalanum

Strípalingar á spítalanum

Steinsofandi á leið heim af spítalanum

Steinsofandi á leið heim af spítalanum

Mini-Siggi í fanginu á ljósmóðurinni okkar góðu

Mini-Siggi í fanginu á ljósmóðurinni okkar góðu

Mömmuknús

Mömmuknús

Pabbi að baða snúðinn sinn

Pabbi að baða snúðinn sinn

Samlokulúr

Samlokulúr

Glötuð þjónusta kæru foreldrar

Glötuð þjónusta kæru foreldrar

Í ömmufangi

Í ömmufangi

Meðan mamma nennti ennþá að prjóna á mig...

Meðan mamma nennti ennþá að prjóna á mig...

Föstudagur 11. nóvember 2011

Vel heppnað Idol-kvöld nýafstaðið hér á Kaupmannahafnargötunni. Við Maggi erum svo södd að við gætum neyðst til að sofa hérna á sófanum í nótt, ég veit ekki hvernig við ættum að komast á fætur… Við elduðum súpu og bökuðum bollur, Íris og Arnar komu með aðeins of djúsí og ljúffengan eftirrétt og Sigurjón skaffaði allskonar snarl og gúmmelaði. Ég öfundaði þau ekki að vera að fara að koma sér alla leið heim áðan með þetta alltsaman í maganum! Siggi hélt sér vakandi eins lengi og hann gat yfir keppninni, en sofnaði að lokum sitjandi í fanginu á mér, alveg sigraður. Hann á eftir að vera brjálaður þegar hann vaknar í fyrramálið og áttar sig á því að hann sofnaði í miðju teitinu…

Þriðjudagur 8. nóvember 2011

Í dag byrjaði ég í nýjum kúrsi, og ætlaði svo aldeilis að hnýta lausa enda eftir tímann, í skólanum, á bókasafninu, í miðbænum… En skólapósturinn lá niðri, bækurnar voru ekki inni, prentararnir voru bilaðir, ég hafði ekki aðgang að rafrænu greinunum og hvorki buxurnar né jakkinn voru til í réttri stærð. Ég kom sigruð heim svo Maggi gæti farið í fótbolta. Hann kom svo heim í kvöld og sagði sorgarsögu af því að mörkin höfðu verið fjarlægð af vellinum þeirra til að gera skautasvell, fótboltaæfingar í fullum gangi á öðrum völlum, og að lokum gefist upp og spilað á markalausum vellinum. Ekki skilvirkasti dagur okkar í Svíþjóð til þessa, verður að játast. En Siggi var hress.